ರಾತ್ರಿ ಕನಸಿನೊಳಗೆ ನೀ ಬಂದ ಸುಳಿವು,
ಕನಸಿನಲಿ ಒಲವು ನನಸಾದಂತೆ ನೆನವು,
ಮುಂಜಾನೆ ಕಣ್ಣುಜ್ಜಿದಾಗ
ದಿಂಬಿನ ಕಾಲಡಿ ಸಿಕ್ಕಿದ್ದು ನಿನ್ನ ಗೆಜ್ಜೆಯಷ್ಟೇ!
ನಿನ್ನ ನೆನಪು ನೆಪ ಮಾತ್ರ,
ಬೇಕಿರುವುದು ನೀನೆ ನೀನು!
ಇಲ್ಲಿ ಜೋರು ಮಳೆಯಾಗಿದೆ ಗೆಳತಿ,
ಮೆಲ್ಲನೆ ತಬ್ಬಿ ಹಿಡಿ ನೀ ನನ್ನ...!
ಒಲವೆಂಬುದು ಇಲ್ಲದಿದ್ದರೆ
ಆರಾಮಾಗೆ ಇದ್ದು ಬಿಡುತ್ತಿದ್ದೆನೇನೋ?
ಮಳೆ ಬಿದ್ದ ಮೇಲೆ ಮಣ್ಣಿನ ಘಮ
ಹಿಡಿಯುವುದಾದರೂ ಎಲ್ಲಿ?
ನಾನಿಲ್ಲಿ ನಿನ್ನ ಅಣತಿಗೆ
ಕಣ್ಣು ಮಿಟುಕಿಸಿ ಕಾದಿದ್ದೇನೆ ಹುಡುಗಿ,
ಆದರೂ ಅಲ್ಲೆಲ್ಲೋ ದೂರದ ತಾರೆ
ಮಿನುಗುವುದಾದರೂ ಏತಕೋ ಗೊತ್ತಿಲ್ಲ!!
